唔少人喺英國租屋前都想去一去心水嘅城巿感受一吓先做決定, 租車自駕遊係最方便嘅途徑, 尤其是如果你一家大細, 拎住好多行李要去幾個城巿的話! 英國同香港都係右軚, 路牌大致上差唔多, 而且英國人揸車比較禮讓同無咁心急, 所以就算你唔熟路, 小心揸問題唔大!
如果有去開日本自駕遊的話, 租車嘅過程大致上你都了解, 咁喺英國租車又有無咩要注意呢?
租車格價網
我一向用開 rentalcars.com, 租咁多次都無試過有問題! 不過你用其他租車網, 或者直接去租車公司website都得!
車牌
雖然話香港車牌頭一年喺英國可以揸車, 但如果你租車的話我都係建議你申請埋國際牌去! 同埋記住記住有國際牌都要帶埋香港車牌喺身, 缺一不可!!
攞車地點
如果出發同離開都係喺同一個機場的話, 喺機場攞車係會比較方便同化算! 不過如果你其中有幾日會喺倫敦搵地方/遊覽嘅話, 我就唔建議你嗰幾日揸車…. 所以你可能喺玩完倫敦開始去其他城巿時先租車!
喺倫敦Heathrow機場攞車的話, 留意係要坐shuttle bus由客運大樓去機場另一邊嘅租車公司, 租車時佢會話你聽上車地點! 唔喺機場攞車的話, 巿內都會有唔同分店攞車, 不過就唔係間間分店都咁齊車, 要花啲心機搵吓!
租車公司
揀比較出名嘅租車公司, 例如Avis, Enterprise, Alamo, Europcar等, 價錢可能較貴但係服務同支援上會好啲!
里數限制
英國租車唔係間間都係無限里數(Unlimited Mileage), 價錢比較平嘅租車公司可能會限每次租車免費嘅里數, 例如1,200miles per rental, 揸多咗係要逐里計錢嘅!
還車入油要求 (Fuel Policy)
有去過日本自駕遊嘅都應該知道還車要入滿油, 喺英國都一樣, 不過攞車時記住check一check油缸有幾多油, 試過有一次租車揸走咗架車之後先發覺原來得1/4缸油, 於是就即刻影低「油針」係咩狀態, 然後去油站入滿缸油再將email通知租車公司!
如果怕還車時搵唔到油站入唔切油, 攞車時佢地都會sell你一個還車唔洗入油嘅option, 不過因為通常嗰舊錢都一定俾你自己入油貴, 需唔需要就自己考慮!
棍波vs自動波
喺歐洲租車, 最平租金嘅啲車全部都會係棍波, 自動波都有得租但租金會貴好多, 同埋供應會少啲! 所以如果諗住慳錢的話, 你要衡量一吓自己揸棍波車夠唔夠熟手, 足唔足夠應付唔熟悉地方適應嘅路面情況加上要成日搵路.....
額外司機(Additional driver)
如果有多過一個人揸車的話, 記住租車(或攞車時)申報埋, 要額外俾錢嘅!
墊底費(excess)
跟車嘅保險都會有好高嘅墊底費, 通常£1000以上!! 攞車時都會問你買唔買£0墊底費嘅額外保險:
優點: 買咗就算架車有咩損傷你都唔洗額外賠錢, 同埋唔洗做咩手續
缺點: 貴, 尤其是如果你租一段長時間的話, 嗰舊額外嘅錢都相當可觀!!
咁有無一啲平啲嘅方法又有相同嘅保障? 你可以選擇喺其他公司買一個保險cover咗租車公司嘅墊底費, 例如 www.rentalcover.com
優點: 平過租車公司買嘅額外保險平大約50% / 會包埋roadside assistance(即係喺路上壞車時嘅救車服務)同埋唔見車匙(key loss)嘅費用等等
缺點: 手續麻煩啲, 你可能要先俾租車扣咗你墊底費, 然後去rentalcover.com claim錢(佢聲稱98%嘅claim都喺3個工作天內批核)
Car seat
英國規定12歲以下或高度未夠135cm嘅小朋友喺私家車裏面係要用Car Seat嘅, 所以租車時記住要租埋! 如果俾警察捉到小朋友無用car seat, 最高罰款£500!
告票手續費
英國motorways影快相好普遍, 仲有好多影相位例如十字路口黃格, 某啲泊車黑點等等, 甚至話免費俾你停兩三個鐘嘅超級巿場停車場, 如果過咗鐘的話都會俾告票租車公司! 啲告票閒閒地都£40-£50起, 除此之外, 仲有一個好少人留意嘅隱藏收費, 租車公司幫你處理呢啲告票係要收手續費嘅(例如£35), 所以一個唔覺意俾人影幾次相隨時唔見£200-300!
揸車要俾路費?
英國嘅路基本上唔似得日本, 法國咁要俾錢先行得高速公路, 你最有機會要俾嘅可能係倫敦嘅congestion charge, 由倫敦去Kent時可能會經過嘅Dartford Crossing, 記住留意呢兩個路費係要自己上網即日交錢, 如果記得交會罰£80或更貴嘅罰款!
英國收費路段嘅資料 https://www.gov.uk/uk-toll-roads
手提電話架
大家都會用Google map搵路, 所以記住喺香港買定個吸喺檔風玻璃嘅電話架過去, 如果可以的話買埋汽車煙插叉電器, 因為唔係架架車都有USB插! (喺英國都有得買, 但可能會貴過香港幾倍)
如果有英國揸車嘅問題, 歡迎喺下面個facebook post留comment!
遊走英國FB page: www.facebook.com/travel.london.uk
遊走英國Blog: www.yaujauuk.com
🍺🍺 如果你覺得我嘅資訊有用, 希望你可以請我飲杯£3嘅啤酒, 俾少少鼓勵我! (支援ApplePay/Andriod Pay) 請click入👉 www.buymeacoffee.com/yaujauuk 🍺🍺
Topcashback Referral Link(免費登記, 仲有£5 sign-up bonus送俾你) www.topcashback.co.uk/ref/travellondonuk
Quidco Referral Link (免費登記, 仲有£10 sign-up bonus送俾你) www.quidco.com/raf/10294854