貓同狗係喺我地身體最常見嘅毛孩… 去到英國生活, 你會發現有一種新朋友喺你嘅社區遊走, 而呢個朋友就係 – 狐狸!!
某一晚返屋企, 見到有一隻四腳動物行出路中心, 離遠睇以為係狗, 但睇真啲個樣有啲唔同, 原來係狐狸嚟!! 如果住郊外, 遇到野生動物唔出奇, 無諗過住喺巿區都會見到! 其實日頭就好少見到佢地, 我都想知佢地其實住喺邊, 夜晚就比較容易見到, 尤其是做Uber司機後周圍去都會見到佢地失驚無神衝出馬路, 又或者喺馬路中心你眼望我眼咁…
有幾多狐狸?
有研究估計, 生活喺巿區嘅狐狸喺過去20年數量增加咗4倍, 單單喺英格蘭就有15萬隻, 大約每300個巿區人口就有一隻! Bournemouth係全英國最高狐狸密度嘅城巿, 平均每平方公里有23隻, London就係18隻, Bristol 16隻, Newcastle 10隻!
有狐狸驚唔驚?
其實狐狸都比較怕人, 同狗差唔多唔會主動攻擊人, 你行近啲佢佢地會逃走, 間中都有報導小朋友或BB俾狐狸傷害, 不過根據RSPCA, 有關嘅個案其實好罕見, 只不過一有發生就會大肆被報導, 令人誤以為情況好嚴重! 不過如果你有喺室外養兔仔, 葵鼠, 雀仔等等而又無好好咁用籠保護好的話, 就好易成為狐狸嘅點心!
點解佢成日跳入我後花園?
可能你個後花園有啲嘢吸引佢, 例如:
水源 (小泳池, 水池等等) – 如果佢地飲過你啲水覺得安全, 就可能會定期幫趁你
糧食 – 肚餓嘅狐狸搵嘢食, 咁啱你花園有嘢食就啱晒, 例如如果你嘅貓糧狗糧, 無冚好嘅垃圾筒等等
容易俾佢地藏身嘅草叢, 或者可以俾佢地掘蟲仔食嘅軟土
花園如果有亂放嘅鞋, 玩具, 工具等等,夜晚喺你瞓咗覺時就會成為狐狸嘅遊樂場
咁點可以阻止佢探你?
封好花園嘅圍欄(不過佢地好叻爬過跳過唔太高嘅圍欄), 木板之間唔好有罅
將花園嘅水源, 貓糧狗糧等等封好, 垃圾桶蓋好, 唔好俾狐狸搵食物
整理好花園, 唔好俾佢地有地方藏身
用趕狐狸嘅工具, 例如超聲波軀狐器等等
有無其他住喺英國嘅朋友有好方法可以同大家分吓?
遊走英國FB page: www.facebook.com/travel.london.uk
遊走英國Blog: www.yaujauuk.com
🍺🍺 如果你覺得我嘅資訊有用, 希望你可以請我飲杯£3嘅啤酒, 俾少少鼓勵我! (支援ApplePay/Andriod Pay) 請click入👉 www.buymeacoffee.com/yaujauuk 🍺🍺
Topcashback Referral Link(免費登記, 仲有£5 sign-up bonus送俾你) www.topcashback.co.uk/ref/travellondonuk
Quidco Referral Link (免費登記, 仲有£10 sign-up bonus送俾你) www.quidco.com/raf/10294854
延伸閱讀: Foxes surge into England's towns and cities https://www.theguardian.com/…/urban-foxes-number-one-for-ev…
The secret life of urban foxes https://www.nhm.ac.uk/…/the-secret-life-of-urban-foxes.html….
THE TOP 5 BEST FOX DETERRENTS https://foxrepellentexpert.com/best-fox-deterrents/