• 遊走英國travel.london.uk

倫敦租樓記

Updated: Oct 13, 2020


好多網友都想知喺倫敦租樓嘅過程係點, 我一於分享下。三年前嘅六月為左方便返工, 我地決定住喺西倫敦, 做咗一啲research同問local朋友意見後, 我地揀咗三個心水區, 分別係 Ealing, Chiswick (Zone 3)同埋Richmond(Zone 4)! 呢三個都係好區, 本地人都鍾意, 我目標係租金£2500以內嘅兩房單位!

第一步就係上Rightmove (rightmove.co.uk), 搵左大概15個心水盤, 逐一打去約viewing, 好好彩咁約到晒喺兩三日內睇。

 

原本諗住自己有得揀, 第一日viewing完結, 睇左四間, 咁梗係諗住睇埋之兩日先做決定啦。去到第二日, 我睇嘅第一間喺Richmond station後面, 步行距離五分鐘, 全新裝修, 地下連花園, 覺得好正, 咁我就決定出offer唔等了!


點知間屋只係放盤兩日, 就已經收到三個offer (包括我地), 結果我加錢都係唔夠人爭, 主要因為我要三星期後先可以搬入, 而對就可以即時起租。

由嗰一刻起, 我先知道原來agent唔係吹水, 倫敦嘅好租盤真係去得好快, 唔爭係會無嘅。

咁我就繼續睇, 去到另一間又Richmond嘅, 等咗一大輪個agent無出現到, 咁我就ring the bell, 個屋主開門, 佢話:「唔駛睇喇, 間屋今日已經租出咗」.... What da.....!!! 但嗰間我上網睇時係好鍾意的, 因為佢個花園另一端起左間屋仔 (summerhouse), 租唔到真係令人太失望!!!


戰敗Richmond後, 轉攻Chiswick! 心水嘅係一間老大屋間出幾個單位出嚟嗰種 (唔好誤會係劏房, 係一間兩房有成千呎嘅大單位), 位置好好但個屋主係中國人, 啲牆油咗紅色, 搭配紅色絲絨窗簾, 再加上啲幾老土嘅傢俬。


英國租樓分furnished and unfurnished, 好不幸呢一間係furnished, 所以係要哽左佢啲傢俬, 十萬個不願意!! 但由於我已經失落左兩間心水盤, 見呢間真係幾好就決定照殺, 同個業主傾吓可唔可以唔要啲窗簾同傢俬, 同埋油咗道牆佢。

個死人agent可能心急想簽成份租約, 一直扮有同業主講, 照攪手續, 我覺得唔對路, 最後我black and white寫第三個email畀佢, 話如果業主唔接受呢啲條件我地就唔簽份約, 終於證實佢真係無同業主傾, 諗住暪天過海! 咁個業主開頭梗係話唔得, 但慢慢佢都由好強硬變到肯拎走部份傢俬, 但堅持要我用佢啲紅色窗簾布, 所以最後我決定唔租, 吹漲!

 

失落嘅我唯有再等, 有其中一個agent同我講Chiswick有個單位, Terrace house兩房, 二樓加Loft, 如果我第二朝早OK的話就係第一個客睇! 已經歷連番失敗嘅我, 梗係即刻仆去睇啦, 一睇就好鍾意 (因為係新裝修, 住Terrace house又係新體驗, 而且又係Unfurnished, 我地可以選擇我哋嘅傢俬配搭), 即時出offer, 最後終於成功租到了, 月租£2300, 安落晒!!

我地租咗嘅係呢款Terrace house
我地最欣賞嘅係呢間喺Loft有靚景嘅光猛en-suite bedroom
 
結論: 倫敦住屋需求真係好大, 所以樓價唔會太低

但由於唔同區嘅個性好唔同, 各位真係要做多少少 research 先好決定住邊度其實唔同城巿唔同區份真係好難比較, 因為並唔係apple to apple! 每個人對生活嘅要求、返工地點、目標樓價交通便利程度、校網好壞等等都有唔同取捨, 而且英國唔係香港咁細, 要三言兩語同你分析住邊道最好, 絕對係mission impossible!


 

遊走英國FB page: www.facebook.com/travel.london.uk

遊走英國Blog: www.yaujauuk.com

 

2,798 views0 comments

Recent Posts

See All